« Eusko Legebiltzarrak honako hau eskatzen dio Eusko Jaurlaritzari :

1- Euskararen erabilera bultzatu eta hizkuntzen arteko bizikidetza ahalik eta orekatuena pixkanaka eraikitzeko helburuarekin, Eusko hizkuntza politika gaietan Euskal Autonomia Erkidegoaren, Nafarroaren eta Ipar Euskal Herriaren artean lankidetza sendotzeko bidea egin dezala, eta horretarako, Eusko Jaurlaritzaren, Nafarroako gobernuaren eta Euskararen Erakunde Publikoaren Lankidetza-Hitzarmen bakarra sinatzeko urratsak eman ditzala.

2- Lankidetza-Hitzarmen horren araberako elkarlana hiru herri-erakundeen erabaki-autonomia eta funtzionamendu-arauak errespetatuz burutu beharko da, eta lankidetza-gaiak zehazterakoan, erreferentzia moduan, Eskualdeetako edo Eremu urriko Hizkuntzen Europako Itunean ezarritako esparruak hartuko dira kontuan.

3- Lankidetza-Hitzarmenaren garapen eta jarraipenerako batzordea osatuko da, bertan Hitzarmenaren sinatzaile diren hiru lurraldeetako herri-erakundeek parte hartuko dutelarik. »