Euzkadi Buru Batzarra ezohiko bilkuran bildu da gaur goizean. Alderdiak Lehendakaritzarako, Eusko Legebiltzarrerako eta Europako Parlamenturako hautagaitzak hautatzeko barne hauteskunde prozesuak abiarazteko urratsa ematea erabaki du. Atera dira, dagoeneko, Herrialde Buru Batzarrei estatutuen arabera bidali beharreko komunikazioak, bai eta hauek Herri Erakundeetara bidali behar direnak, gaurtik aintzina Urtarrilaren 20ra bitartean garatuko den prozesua aktibatzeko. Imanol Pradales Gil izanen da EBBk proposatzen duen Lehendakarigaia.

Andoni Ortuzarek, Euzkadi Buru Batzarraren presidenteak, baieztatu du “ Euzkadi Buru Batzarrak Urkullu Lehendakariak azken hiru legealdi hauetan egin duen lan ederra eskertzen duela. Ia hamabi urteko konpromiso eta dedikazioa izan dira, Euskadiren alde eta bere gobernuan, beti herritargoaren onbeharrez eta krisi ekonomikoek, pandemiek eta nazioarteko zein gure gizarteko gatazkek konplikatu dituzten garaietan. Gure alderdiak oso modu positiboan baloratzen ditu bere jarduna eta gure autogobernuaren goi ordezkaritza ”.

“Epe ertain eta luzera begiratuz eta Urkullu Lehendakariak eta bere gobernuak utzi diguten oinarri handiarekin, EBBk ulertzen du une egokia dela belaunaldi berri bati bidea irekitzea datozen hamarkadetan euskal erakundeak gobernatu ahal izanen dituenak gure Herriarentzat planteatzen diren ziurgabetasun eta aukerez betetako garaiak datozela ikusirik”, gaineratu du jeltzaleen buruak.

Belaunaldi hori gorpuzten du, hain zuzen EBBk Lehendakaritzarako proposatu duen hautagaiak. Imanol Pradales Gilek 47 urte ditu, Santurtziko Herri Erakundeko alderdikidea da, Soziologian doktorea da, hiru eleduna da, hainbat master egin ditu eta soberan erakutsi du kudeatzeko gaitasuna duela. Alderdiak azken hamar urteotan garatu dituen hausnarketa eta berrikuntza prozesuetan egin duen ekarpenek bihurtu dute gure barneko eta kanpoko errealitate politikoaren aditu.

EBBk alderdikide guztiak deitzen ditu gaur hasi den prozesuan parte har dezaten “Alderdiaren etorkizuna, baina batez ere Euskadiren etorkizunak, gure alderdikideen inplikaziorik gorenena eskatzen dute. Ziur gaude hala izanen dela eta urtarrilaren 20tik aintzina lantalderik onena izango dugula gure alde, Euskadiren onerako ideia eta proiekturik onenekin, ilusiorik handienarekin eta gogotsu proiektu guztiak errealitate bihurtzeko, gure Herria bizitzeko tokirik onena izan dadin”. Ziurtatu du Ortuzarrek.